الجزء مئة واحدى عشر
بعد ما اشواق ردت البيت وهي مستانسه وايد لانها خذت رقم فهد طبعا فاطمه ماتعرف .. لانها كانت ويا ساره ..
اشواق بتحاول قد ما تقدر تخلي فهد لها ..
#########################
فهد يدق الباب على ساره بالغرفه الثانيه عسب يكلمها
ساره وهي لابسه بجامه تبى تنام : هذا انته خير يا فهد
فهد بكل ادب : ساره يمكن اكلمج
ساره واقفه عند باب غرفتها : اسمحلي ابي انام باجر عندي دوام ومب متفجيه اكلم حد
فهد : بس دقايق
ساره : اوكي بس بسرعه
فهد دخل غرفتها
ساره واقفه تشوفه مستغربه شو اللي يباه
فهد رفع راسه : ساره شو رايج نغير الجو واوديج فجيره او بوظبي هناك انتم كم يوم ونرد ترى عندي لج مناطق حلوه
ساره رافعه حواجبها مستغربه :والله ترمس صدق ولا تتغشمر
فهد : لا والله ارمس صدق ..
ساره مربعه ايدنيها : طبعا لا نسيت ان عندي دوام هذا اولا ثانيا مب متفيجه اروح لاي مكان
فهد : بس كم يوم عسب تغيرين جو
ساره : انت قصدك عسب اتغير صح .. لو وديتني لاخر الدنيا بعاملك نفس الشي .. وما شي فايده يا فهد باللي تسويه صدقني
فهد يأشر بصبعه : مااكون فهد اذا ماعرفت شو سبب تغيرج..
فهد طلع من الغرفه وهو معصب ومنفعل ..
ساره يوم طلع فهد ماقدرت تقول شي ... وماتعرف شو اللي يقصده
فهد فهد ما قدر ينام بهاليوم وهو يفكر كيف يعرف تغير ساره المفاجئ لانها قبل كانت وايد زينه ويايه وصح ما كانت تحبه بس كانت تحترمه وتقدره..
فهد وهو متساند على السريريكلم عمره: لازم اعرف شو سبب تغيرج يا ساره لازم ..
ساره ردت شغلها وهي مستانسه على هاليوم لانها صدق مشتاقه للشغل ولرباعتها ..
ميثاء ربيعة ساره بالشغل : هلا والله بساره
ميثاء وساره يتوايهون ( يحبون بعض )
ساره : هلا فيج شحالج عساج بخير
ميثاء : بخير مدام شفتج وينج طولتي الغيبه ماصار شهر العسل
ساره ابتسمت : بالعكس ما طولت وايد قطعت اجازتي
ميثاء : هيه صح انتي قلتي ان 3 اشهر وييتي قبل شو مليتي
ساره : لا مب جي السالفه بس اشتقت لج وللشغل
ميثاء : وععععععععععع حد يشتاق للتعب وللشغل
ساره : تعرفيني اموت بالغشل وبالذات لاني الكل بالكل بهالقسم
ميثاء : ما تنلامين رئيسة قسم
ساره : اللي يسمعج يقول رئيسة قسم على الاداره كلها .. يا دوب رئيسة قسم على هالقسم الصغير
ميثاء: المهم انج رئيسة قسم
ساره : زين خلينا عن الشغل الحينه شحالج وشحال الخطيب ( تغمزلها )
ميثاء استحت : والله تمام الحمد لله
ساره : ومتى ان شاء الله الملجه ( كتب كتاب )
ميثاء : يريب ان شاء الله بعد اسبوع تقريبا
ساره : بعدين بنشوفج كله سرحانه
ميثاء ويها احمر : ليش يعني
ساره : علينا .. لانج اربع وعشرين ساعه بتفكرين بكلامه لج اخر الليل وبشكله
ميثاء تضرب ساره : ايه استحي لا تقولين جي .. واكيد انتي مجربه
ساره بخاطرها ( لا والله ما جربت اني اسرح وافرح لاني ماخذيته عن حب )
ميثاء : بلاج ليش تضايجتي
ساره : ولا شي يالله عن اذنج بشوف الشغل هند تتصل في نوره
هند : صباح الخير
نوره توها قايمه من الرقاد ( النوم) : منو هند
هند : بسج رقاد قومي
نوره : والله انج حشره يا هند شتبين صباح الله خير موعتني
هند : بس حبيت اذكرج ان اليوم لازم اتين حق زهبتي ( تجهيزات العرس* ) مب تنسين ترى صدق ماباجي شي
نوره : يعني لازم تقوميني من الصبح وتقوليلي هالكلام ما صبرتي على الاقل بعدين
هند : لا
نوره : والله انج متفيجه
هند : نوروررره مب تنسين
نوره : اولا احترمي عمرج اسمي نوره مب نوروووه
هند : نوره ولا نوررووه المهم انتي نفسج
نوره : اقول جلبي ويهج وخليني انام تعبانه يالله باي
هند: زين كلتيني .. باي
هند وايد مستانسه لان عرسها ما باجي شي عليه ..
############################## ##
والعصــــر..
ام محمد يالسه تتريه محمد يطلع من غرفته
محمد مر وهو متبلس يبى يطلع ..
ام محمد : محمد
محمد صد : لبيه
ام محمد: تعال شويه ابي ارمسك بسالفه
محمد اقترب من امه ويلس عندها : خير يا امايه
ام محمد بابتسامه ووبصوت واطي : انا رحت عند شيخه اليوم وكلمتها
محمد فتح عيونه واتوتر وايد : زين وبعدين
ام محمد : وحبيت اعرف اذا حد لعب براسها عسب ترفضك .. بس عرفت منها انها هي اللي اختارت هالشي ومحد لعب براسها ولا شي ..
محمد ابتسم وارتاح : ما قلت لج انا مالي خص وانا ما اتفقت وياها
ام محمد : ولا بعد انا سالت عن الريم
محمد وميت من الوناسه : والله
ام محمد بابتسامه : والكل مدح فيها وباخلاقها وبدينها والاكثر ( تغمزله ) بجمالها
محمد : يعني موافقه
ام محمد : هيه موافقه وان شاء الله اليوم او باجر بخلي ابوك وخالك وعمك يروحون يتقدمون لها عند عمها وخوها فهد بس اول شي بنتصل في عمها ..
ام محمد : وتعرفين رقم عمها ..
ام محمد : الصراحه لاء ..انت تقدر اتيب رقم عمها
محمد : بييب الرقم وبييت ابو الرقم بعد .. بتصل في خالد وهو ما بيققصر .. وبييبلج اليوم ان شاء الله بس ترى عمها في بوظبي
ام محمد : مشكله بعيده بوظبي
ام محمد : بس عادي بنخلي عمها اييه بيتهم عند فهد وهناك اتقدمولها احسن على الاقل اييون بيت الريم
ام محمد : ان شا ءالله بنتصرف المهم انت ييب الرقم
محمد وقف ويحب راس امه : فالج طيب يا امايه ومشكوره ما قصرتي عساني ما نحرم من ام مثلج
ام محمد بابتسامه : حبتك العافيه يا وليدي وعسى الله يهنيك..محمد طبعا على طول اتصل بخالد وخبره السالفه
خالد : زين زين والله يا وجاسم واخيرا حلمك بتحقق ان شاء الله
محمد وهو طاير من الفرح : تصدق يوم الوالده قالتلي شويه ابي اطير من الفرحه
خالد بنبره كلها حزن ":: حاس فيك ..تذكرت يوم امايه قالت انها بتخطبلي ساره وان ساره وافقت قلت لها نفس الكلا م
محمد : الحينه انا متصل عسب تستانس ويايه مب تضايج
خالد : اكيد ما بخرب عليك وناستك ..
محمد : خالد طلبتك يا خويه
خالد : عطيتك ..اطلب اللي تباه
محمد : ما قصرت .ابيك اتييب رقم عم الريم
خالد : ممممممممممممممم يعني لازم اطلب من ساره عسب تقول حق الريم
محمد : اي طريقه انا ما يهمني بس ابيه اليوم الله يخليك
خالد : افا عليك اصلا هاي احسن فرصه عسب اكلم الحب
محمد : شقصدك ترمس ساره تتصل فيها
خالد : طبعا
محمد : شو انت خبل تتصل في وحده متزوجه لا بعد وقبل كنت خطيبها
خالد : ماعليك الحينه مب تبى رقم عمها خلاص
محمد : هيه والله اهم شي عندي عسب على الاقل اليوم او باجر ان شاء الله بالكثير نتقدم حق الريم
خالد : خلاص الحينه باخذ الرقم .. وبتصل فيك
خالد ما صدق على طول اتصل بساره وللاسف مايعرف باللي يسويه انه غلط وحرام
خالد وهو يتصل فيها
ساره كانت في الصاله ويا الريم وفهد ويوم شافت الرقم توترت
ساره وقفت : عن اذنكم
الريم تصد : وين
ساره بتوتر : بروح ارد على ربيعتي
فهد : يعني ما يستوي تردين الحينه وجدامنا
ساره : والله عندي سوالف وياها وما بي حد يسمعها
ساره راحت غرفتها وردت عليه : الو
خالد : هلا بصاحبة الو
ساره تشوف يمين يسار: خالد بعد اتصلت ما قلت لك لا تتصل
خالد : والله ابي اقولج شي ضروري وتعرفين مرسال الغرام نوره ما تسويلي سالفه الحينه فلازم انا اللي اتصل
ساره : وتخيل فهد شاف الرقم ولا شي
خالد : خلا يولي مالت عليه ..
ساره : ومب بس عسب فهد بس انا والله ما احب اكلم حد غريب لاني بذمت ريال ولا تنسى هالشي
خالد : لا تعورين قلبي اكثر .. المهم بقولج ترى اهل محمد يبون يتقدمون للريم
ساره استانست واتششقت من الفرحه : والله
خالد : هي والله وابيج يا ساره تاخذين منها رقم عمها لانه هو الاكبر
ساره : خلاص ولا يهمك باخذ الرقم من الريم .لان فهد اذا طلبت منه بيسال الف سؤال
خالد : ويوم تعرفين الرقم طرشيلي مسج اوكي
ساره : اطرشلك انت
خالد : هيه انا عيل منو .. لا تنسين
ساره : خلاص فالك طيب
خالد : فالج ما يخيب .. عيل اخليج
ساره : بحفظ الله
ساره استانست وايد من هالخبر ..
ساره راحت الصاله وبابتسامه ..الريم تعالي بغيتج
الريم : شو مستوي ؟ وليش مستانسه هالكثر
فهد : والله حق ناس وناس تبتسم اما يوم تشوفني بس تبوز وتتحرطم
ساره شافته بنظره وطنشته
الريم : ويه الحينه بتضاربون
ساره : شو يالريم بتين ولا
الريم: زين بييه
الريم وساره راحو الغرفه
ساره : يلسي
الريم يلست ..: خير شو فيه
ساره باتسامه حلوه : يمكن تعطيني رقم عمج
الريم مستغربه :وليش
ساره : لانه اهل محمد يبون يتقدمون للانسه الحلوه الريم
الريم استحت وابتسمت : صدق
ساره تلقدها : هيه صدق
الريم متوتره من الحياء ..
ساره : بعدين استحي .. عطيني الرقم بسرعه بس لا تقولين لفهد
الريم : وليش لازم اخويه يوافق وحتى لو عمي وافق وفهد ما وافق ما برضى تعرفين اهم شي عندي اخويه
ساره : وليش ما يوافق .. اصلاوين بتحصلون حد شرات محمد بطيبه واخلاقه ودينه ..والله محمد ونعم الرياييل
الريم : مبين عليه
ساره : يا ويل حالي بدى الحب ..
الريم : عاد ساره بدت تلعوزني الحينه
ساره : المهم عطيني الرقم بسرعه
الريم : اوكي الرقم *******
ساره : خلاص مشكوره .. وان شاء الله نسمع خبر عن خطوبتج
الريم استحت ونزلت راسها
(( الريم من شافت محمد وهي معجبه فيه وبالذات يوم الكل مدح باخلاقه وبطيبته وبشخصيته ))
ساره طرشت مسج لخالد وعطته الرقم ..
وابو محمد اتصل في عم الريم واتفقو ان باجر اييون بيت فهد عشان يتقدمون للريم وطبعا اكيد بوجود عم الريم
فهد كان بغرفته وكان يبى يطلع عسب يقول لساره والريم ان اهل محمد بيتقدمون للريم وشاف المسج
واستغرب وقال بنفسه : اول مره اشوف هالرقم .. اكيد مغلطين
وطنش السالفه
فهد راح عند الريم وشافها بغرفتها ويا ساره
فهد : زين حصلتكم ويا بعض
الريم اتوترت وعرفت ليش فهد ياي : هلا اخويه حياك
فهد يلس عند ساره .. ساره ابتعدت شوي ..
فهد : حبيت اقولكم ان في واحد يبى يتقدم للريم باجر ان شاء الله
ساره تستعبط : والله زين وهو شو اسمه ومن اي عايله
فهد : اسمه محمد خليفه بن *****
ساره : ونعم العايله والله
الريم استحت وماقالت شي
فهد : يالله كيف الحلوه مستحيه هذا وهم بعدهم ما يو وما خذيت رايج ..بس بعد ما ايون ان شاء الله وبسال عن الريال واذا طلع ريال محترم وزين بقولج مبروك يا احلى اخت بالعالم ...
الريم قامت اونها استحت
فهد : وين بتروحين
الريم ويها محمر :ها ممم بروح بروح المطبخ بشربلي ماي وبييه
فهد يضحك : هههههههههههه قولي مستحيه وتبين تشردين (وهني وصل لفهد من اشواق مسج ثاني ))
المسج هو :
ودي بس ودي تحس باشواقي وحبي
ودي بس ودي تكون لي يا اغلى ناسي
فهد مستغرب : وبعدين وياهم
الريم : منو
فهد : وصلي مسج من رقم غريب
الريم : يمكن متلخبطين
فهد : يمكن بس هذا المسج الثاني
الريم : زين اتصل وشوف منو
فهد : اذا طرشو مره ثانيه بتصل فيهم وبشوف
الريم تنغز : يمكن معجبه يديده
فهد يشوف ساره : يمكن ليش لاء على الاقل حد يحس بوجودنا
ساره قامت : تصدق يبالك وحده تكون معجبه فيك يمكن شوي تودرني بحالي
طلعت ساره من الغرفه
فهد معصب واصل حده : بذمتج في زوجه تقول هالكلام هذا بدل ما تغار وتنقهر
الريم : يمكن هي تسولف
فهد : ما شفتي كيف ترد عليه بكل جراه ..
الريم : ماعليه اخويه هد اعصابك ..واكيد هي ما كانت تقصد
فهد والحزن بعيونه : بلا هي تقصد يالريم ..هي تحاول قد ما تقدر تقلل من وجودي ..مع اني وايد استحمل كلامها ومع هذا كله ما اييه بعينها شي .
الريم : يالله ما ابيي اشوف الحزن بعيونك .. يالله عسب خاطري
فهد بابتسامه : عسب خاطرج ياا احلى اخت بالعالم بغير مزاجي اليوم
الريم تحضن اخوها : وعسى الفرحه بممشاك وبدربك يا فهد ..الريم تمت تصيح ..
فهد : بلاج يالريم
الريم : ماعرف بدونك شو كان بيستوي فيه ..انت كنت بمثابة الابو والام ..والاخ وكل شي ..عمرك ما ضايقتني ولا قصرت فيه .. والله ماعرف شو كنت بسوي بدونك
( تمت تصيح ))تذكرت الريم امها وابوها ..
فهد ماسك ايدها : بس يالريم دموعج غاليه ..وانا بعد ماعرف شو كنت بسوي بدونج انتي بعد كل شي بالنسبالي ..يالله مسحي دموعج .. ما ابي اشوف هالدموع بحياتج
الريم تهز راسها / : ان شاء الله
الريم وايد متعلقه باخوها فهد .. لان فهد بالنبسالها كل شي بعد وفاة وواليدنها هند وهي تكلم سالم
هند معصبه : يعني شو هذا كله تلفونك مشغول ..تعرف من اكثر من ساعه وانا اتصل فيك
سالم : شو اسوي حبيبتي الكل يباني اليوم
هند : والله وانا مب لازم تعطيني من وقتك
سالم : يالله خلاص ما ابي اشوفج معصبه حقج عليه
هند : ساكته
سالم : شو وين رحتي اليوم
هند : طلعت ويا نوره عسب تجهيزات العرس
سالم : شو تشريتي عدل
هند : يعني رحت هني وهناك ودورتلي مصمم ويا دوب قال بيفصلي .. لاني متاخره
سالم : صح ما باجي شي على عرسنا ان شاء الله
هند : صدق الايام بسرعه تمر
سالم : يالله الاهم نكون لبعض ..وصدقيني حياتنا بتكون من اروع اللحظات
هند بدلع : واثقه من هالشي ..لاني خذتك عن حب وقناعه
############################## ######
وفي اليوم الثاني
عبدالله ونوره راحو يفصحون ..والدكتوره قالت ان باجر النتيجه راح تكون
عبدالله بالسياره : ها استانستي ..رحنا العياده وفصحنا
نوره : هيه الحمد لله .. وان شاء الله نتيجه الفحص تكون سليمه
عبدالله : ان شاء الله ما يكون فينا شي .. على الاقل ما تحاتين
نوره : وانت يعني ما تحاتي
عبدالله : واثق برب العالمين .. وبقدرته وبحكمته .. والصبر مفتاح الفرج ..وبعدين انا يهمني انتي يا نوره ..
نوره ابتسمت : وان شاء الله اقدر اسعدك لاخر حياتي
نوره استانست انهم فحصو بس طبعا هالشي ما يمنع انها وايد خايفه ومتوتره عسب النتيجه ..
اشواق ما ملت وردت بعد اطرش مسج
المسج :
يا مسج روح يمه وقله ..اني بالحيل مشتاق
وانه هو الوحيد اللي بقلبي
وقله : اني مااقدر على بعده
فهد راد من الشغل شاف المسج
فهد : نفس الرقم . لازم اتصل واشوف شو السالفه
فهد اتصل باشواق وهو مايعرف انها اشواق
اشواق مستانسه : فهد متصل فيه
اشواق ردت عليه وبرقه : الو
فهد : السلام عليكم ..
اشواق : وعليكم السلام
فهد : اختي اسمحلي بس حبيت اعرف منو صاحب هالرقم
اشواق : انا وليش
فهد : لان من البارحه كم مسج وصلي ..وقلت يمكن حد قاصدني او متخربط بالرقم
اشوق بكل جراه : لا مب لخبطه ولاشي .. نحن قاصدينك
فهد استغرب : ليش منو تكونين
اشواق : انا انسانه صريحه وايد ومعجبه فيك لاخر الحدود
فهد : اكيد انتي متلخبطه يمكن تتحريني حد من اللي تعرفينه
اشواق : لا انا اعرفك عدل انت فهد .. صح
فهد استغرب : يعني تعرفيني
اشواق : هيه اكيد اعرفك ليش في حد مايعرفك
فهد : يمكن اعرف انتي منو
اشواق : انا اشواق ربيعة فاطمه اللي يينا بيتكم
فهد فتح عيونه ويقول بنفسه : صدق قويه عين يعني رييعة ساره ومتصله فيه..
اشواق : ليش ساكت
فهد : شوفي يا اشواق انا ما بصك على ويهج احترام لانج ربيعة زوجتي بس حبيت اقولج لا طرشين هالمسجات مره ثانيه ..
اشواق : وليش ؟ ترى كل مسج من قلبي يا فهد
فهد : اسمحيلي الحينه لازم اصك يالله باي
صك فهد التلفون وهو مستغرب من جراه اشواق
اشواق وهي ماسكه الموبايل : هذا ويهي اذا ما كنت لي اصبر يا فهد عليه
فهد يكلم نفسه : معقوله انها معجبه فيه .. معجبه بانسان متزوج بعد .. صدق يوم قالو بييه زمان البنات يلحقون ورا الشباب .. ولا على حظي انا بعد الله المستعان على هالزمان ...
واهل محمد يو بيت فهد وطبعا فهد وعمه موجودين
وابو محمد طلب ايد اخته لولده وعم فهد قال انهم بيسالون عنهم وبيردون الخبر لهم طبعا بعد ما يسالون راي البنت
ساره والريم بالصاله يتريون الاخبار من فهد
ساره : يالله اتاخرو متى بيطلعون
الريم تبتسم : اللي يشوفج يقول انهم يايين حقج
ساره : ترى انا وانتي انتي بمثابة الاخت يا الريم وانا مستانستلج وايد بالذات لانكم تليقون لبعض محمد انسان ما في منه وانتي بعد
الريم : تسلمين يا ساره
عم فهد راح بعد ماسلم على الريم وساره
فهد يشوف الريم مستحيه : تقدمو مثل ماقالو وان شاء الله من باجر بسال عن الولد بس اسم الولد مب غريب عليه كاني سامع هالاسم واللقب
ساره بكل ثقه : ليش انت ماتعرف محمد ..هذا محمد ربيع خالد من الطفوله
فهد فتح عيونه : محمد ماغيره الا اربع وعشرين ساعه ويا خالد
ساره : هيه .وهالشي من صالحنا لانا نقدر نعرف عن الولد زين لانه ربيع خالد . ومحمد اعرف عن اخلاقه وصفاته من زمان ..لانه دايما يتردد على خالد يعني كاخوه
فهد : زين عرفت عيل .. عيل من الحينه اقول ان مستحيل ارضى بمحمد لاختي
ساره عصبت : وليش ان شاء الله
فهد : لانه ربيع العدو اللي مخرب حياتي
ساره : اول شي صلح عبارتك انت اللي مخرب حياته ..وبعدين محمد شدخله بالسالفه ..خالد وعرفنا انك ما تحبه بس محمد شدخله ..يعني عسب ربيعه ترفضه شو هالتفكير
فهد : ما ابي شي من صوب خالد سمعتي
ساره : ترى انا بعد استوي بنت خالته يعني من صوبه
فهد : انتي غير وبعدين ..يمكن خالد يبى ينتقم مني باختي عن طريق ربيعه محمد
ساره : شقصدك
فهد : يعني خالد يبى يقهرني وينتقم مني لاني خذتج ويخلي ربيعه يتقدم للريم .. عسب يخلي حياتها سوده .. وهني يكون صدق انتقم مني لان اللي يمس اختي يمسني
الريم استغربت من كلام اخوها وراحت غرفتها وهي متضايجه
ساره : شو هالتخلف يا فهد ..شو هالتفكير .. انت شو تقول
فهد : عيل محمد شعرفه بالريم
ساره : والله الدنيا صغيره يمكن هو يدور له وحده وحد رشحه بالريم ..او يمكن لانه خالد يعرف الريم عدل لانها ربيعتي من الطفوله قال لمحمد ..
فهد : المهم ما ابي شي من طرف خالد
ساره : ليش محمد ولد خالد مثلا عسب تقول ما ابي شي من طرفه ولا اخوه هذا ربيعه ما يخصه بالسالفه ..
فهد : هاللي عندي .. وخلا يمر كم يوم وبرد عليهم بالرفض
ساره : بس صاحبة الموضوع هي الريم مب انته
فهد : ومستحيل الريم تاخذ واحد من دون رضايه
سار ه عصبت : توني اتاكد ان تفكيرك مثل اليهال
ساره راحت غرفتها وهي معصبه ..
اما فهد فمقتنع ان ما يبى محمد للريم ..وفهد مايعرف ان الريم بالنسبه لمحمد كل دنيته ..وانه سوى المستحيل عسب ياخذها ..
الريم راحت غرفتها وهي متضايقه لانها وايد معجبه بمحمد بس بعد هي مستحيل تزوج اي شخص من دون رضى فهد لان فهد هو كل شي بالنبسالها ..
ساره طرشت مسج لخالد وقالته السالفه باختصار بس قالت انها بتقنع فهد بمحمد طبعا بعد ما يسالون عنه اكثر..
خالد تضايق وايد لان محمد سوى المستحيل عسب ياخذ الريم .. وما حب يقوله لانه مايبى يخرب عليه يومه ..
خالد بخاطره : اتمنى يا محمد تاخذ اللي بخاطرك وما يستوي لك مثل ما استوالي
