الجزء مئة واثنى عشر
بعد رفض فهد للمحمد ..
الريم تمت بغرفتها متضايجه توقعت انها بتسعد ويا محمد وانه بيكون رجل حياتها ..
ساره دخلت غرفتها وشافت الريم منسدحه على السرير
ساره : الريم يمكن اكلمج
الريم يلست : اكيد
ساره يلست عندها : شو رايج بكلام فهد
الريم مربعه ريولها وبحزن : اللي اقدر اقولج اياه يا ساره ان راي اخويه هو الاهم
ساره بجديه : يعني تتوقعين ان محمد متقدم لج عسب خالد قايله عسب ينتقم له
الريم : ما قلت جي ..وبعدين انا ماعرف كيف تفكيره .. بس
ساره : لا بس ولا شي انتي تذكرين كيف نظرات محمد يوم يشوفج والله حرام تعرفين انه عايلتهم كانت شوي تبى تتشتت عسبج
الريم مستغربه : ليش
ساره : لانه من الصغر هو لبنت عمه ويوم شافج غير رايه وقال لبنت عمه عسب ترفضه تتخيلين هالشي .. والام زعلت من ام شيخه اللي هي بنت عمه يعني زين ما كبرت السالفه واخر شي ماياخذج حرام
الريم نزلت راسها وتضاجيت اكثر ..
ساره : الريم انا فاهمه محمد اكثر منج تعرفين ليش
الريم : ليش
ساره : لاني مريت تقريبا بنفس التجربه ..تخيلي هو يحبج ويباج وحلمه انج تكونين شريكه حياته واخر شي كل شي يروح عنه والله شي يضايج
الريم : بس مب بايدي شي والله بعد ما اقدر يا ساره اقول لاخويه ابيه والله مب حلوه
ساره : اعرف ..بس المهم انج تبينه صح
الريم منزله راسها وبكل خجل : محمد ما يتعوض
ساره مسكت ايد الريم وبابتسامه : بحاول المستحيل عسب تكونون لبعض
الريم : هذا كله لانج تبين محمد يكون لي
ساره : اول شي لان محمد ما يتعوض وبعدين لاني حاسه بمحمد واحس كيف بيكون شعوره اذا خسرج
الريم : اذا الله كاتب لنا النصيب صدقيني كل شي راح يتم على خير
ساره : ونعم بالله ..خلاص اخليج تنامين
الريم معجبه بمحمد وزاد اعجابها اكثر يوم عرفت ان محمد رفض بنت عمه وسوى المستحيل عسبها ..
وفي اليوم الثاني
خالد ما قدر ينام من كثر ما يفكر في ربيعه محمد وقرر يتصل في ساره
ساره وهي راده من الدوام وهي بسيارتها خالد اتصل
ساره : الو
خالد : مرحبا
ساره مستغربه : مراحب ..خالد بعد اتصلت
خالد : قلت بتصل بج الحينه والله ما اقدر اتريه اكثر من كثر ما افكر بربيعي محمد .. ها بشري ما شي اخبار يديده
ساره : والله ما شي اخبار ..حاولت ويا فهد بس هو مصمم اللي براسه
خالد بعصبيه : شو هالتفكير المتخلف ..حرام والله محمد يحب الريم ..
ساره : ادري بس هو ما يبى
خالد : بس هو ما يرفضلج طلب
ساره : ما احب اترجاه اكثر ..
خالد : حاولي وياه اكثر حرام ربيعي محمد رفض بنت عمه ..صدق يكسر الخاطر
ساره : قلت لمحمد ان فهد رفضه
خالد : الصراحه ما اقدر اقوله ..ما ابي اجرحه
ساره : شو نسوي
خالد : عندي حل ..شرايج اروح اكلم فهد واقنعه ان محمد ماله خص
ساره : لا لا لا الله يخليك لا تروحله
خالد : ليش
ساره : تعرف فهد ما يدانيك ولا يحبك ..وبهالطريقه راح يعاند اكثر
خالد : الحينه انا اللي اموت عليه انا مب رايح عسب ( عشان ) سواد عيونه
--------------------------------------------------------------------------------
ساره : خذ مني ولا تروح عنده اسمع كلامي والله لو رحت بيعاند اعرف تفكيره
خالد : يعني شو نخلي محمد يتعذب مثل ما اتعذبنا
ساره : عندي حل احسن من حلك
خالد : ها قولي
ساره : شرايك تقول لمحمد يكلم فهد ويقنعه بالطيب والزين ومن بعد ما يكلمه انا بعد بكلمه وبحاول اقنعه
خالد : تتوقعين راح يقتنع فهد
ساره : نحن نحاول ما بنخسر شي
خالد : خلاص اوكي بتصل بمحمد وبقوله
ساره : الله يسر امورهم
#############
خالد قال لمحمد الخبر ومحمد من سمع هالخبر تم ساكت
خالد : محمد وينك
محمد شوي والدمعه بتنزل : يعني الريم ما بتكون لي
خالد : لا تفقد الامل يا محمد
محمد : انت تقول ان فهد معاند كيف راح يقتنع .. زين ما تعرف ليش ما يباني
خالد : اونه يقول اني ابي انتقم من فهد عن طريقك .. يعني انا قلت لك تزوج اخته الريم عسب انته تنكد حياة اخته وتعيشها بكدر ومشاكل وهني الريم بتتعذب واكيد فهد بيتعذب بعذاب اخته شفت التخلف
محمد : الصراحه تفكيره مب متخلف
خالد فتح عيونه : انت شو تقول ..
محمد : صح يا خالد شي بهالزمن ناس جي
خالد : يعني في واحد متفيج ياخذ وحده عسب ينتقم شو نحن بمسلسل مكسيكي او فلم هندي
محمد : ترى بواقعنا اكثر .. يعني هو خايف على اخته مني لاني ربيعك وايد .. لا تستبعد هالشي
خالد : اعتقد سبب رفض فهد لك ..خلا تفكيرك مثل تفكيره ..الحينه خلا ندور حل
محمد : اي شي راح اسويه بس ما ابي الريم تروح لغيري والله اني اعشقها يا خالد اعشقها
خالد : حاس فيك يامحمد والله حاس .. اصعب شي عند الانسان انه ينحرم من اللي يحبها ..
محمد : زين وشو اسوي بموت ااذا ما خذتها
خالد : باسم الله عليك ..انت شو تقول .. لا ان شاء الله ما بيستويلك شي .. انت روح عند فهد وكلمه اليوم واقنعه بطريقتك الخاصه
محمد : وتتوقع بيطيع يكلمني
خالد بعصبيه : تخسي الا هو .. ليش هو وزير عسب يقرر يكلمك ولا لاء. المهم روحله اليوم وكلمه
محمد : مستعد اسوي اي شي .. الا اني اخسر الريم
خالد : يارب الريم تكون من نصيك يا محمد وحظك ما يكون مثل حظي
محمد : قصدك النصيب ..لان بهالدنيا كل شي مكتوب مب بالحظ ..
خالد : يارب الريم تكون من نصيك يا محمد وحظك ما يكون مثل حظي
محمد : قصدك النصيب ..لان بهالدنيا كل شي مكتوب مب بالحظ ..
خالد : صدقت والله
والنتيجه باليوم الثاني
نوره وعبدالله راحو يشوفون النتيجه ..
نوره وهي عند الدكتوره : ها يا دكتوره بشري
عبدالله : اعصابج
نوره : ما اقدر لو تشوف قلبي كيف يدق
عبدالله يضحك : ليش قبل ماكان يدق..عيل كيف كنتي تعيشين اخاف عندج مصدر ثاني بدل القلب
نوره : عبدالله احر ماعندي ابرد ما عندك اسكت شوي خلا الدكتوره ترمس ( تتكلم ))
الدكتوره تشوفهم بابتسامه بعد ما قرت التحاليل : اقدر اقولكم مبروك ما فيكم شي ..والتحاليل كلها سليمه
نوره شوي حلجها بينشق /والله
عبدالله مبتسم : ما قلت لج بس انتي وسواس الخناس
نوره : متاكده يا دكتوره
الدكتوره : اكيد متاكده انتي وريلج ما فيكم شي الحمد لله
نوره / عيل شو سبب التاخير
الدكتوره : التاخير من عند رب العالمين مب شرط اذا وحده تاخرت بالحمل يعني فيها شي ..
نوره : الحمد لله الحمد لله
الدكتوره : يالله عقبال ما نشوف عيالج ان شاء الله
نوره : ان شاء الله مشكوره دكتوره
نوره وعبدالله بالسياره
نوره تدمع
عبدالله : افا ليش هالدموع
نوره : وايد مستانسه
عبدالله : اللي يسمعج يقول انج حامل يعني لو حملتي اخاف تسوين لنا بحر من الدموع
نوره تبتسم : بلاك اليوم وايد تستعبط
عبدالله : ما ادري عنج
نوره : وايد كنت متوتره
عبدالله : ها شو الحينه مستانسه
نوره : وايد وايد وفرحتي بتكبر ((تأشر على بطنها )) اذا الله رزقنا بياهل
عبدالله : ان شاء الله .. الله يرزقنا بذريه صالحه ومايحرم اي ام بهالشعور
نوره : امين
نوره استانست وايد بهالخبر ..على الاقل اطمنت انها تقدر اتكون ام بيوم من الايام
##########################
اشواق وهي مصره على فهد ...
اشواق تتصل في فهد ..
فهد توه ياي من الشغل وهو يالس يغير ملابسه
--------------------------------------------------------------------------------
فهد يشوف الرقم ومعصب : لا حول ولا قوه الا بالله ..صدق ما تستحي على ويها ماعرف شو اسوي فيها
فهد يرد من غير نفس : الو
اشوق برقه : مرحبا
فهد بجديه : مرحبتين
اشواق : شحالك فهد
فهد : اشواق شوفي ما احب اجرح حد ..بس والله عيب اللي تسوينه ..انا ريال متزوج وما يستوي تكلميني وحتى لو مب متزوج بعد ما يستوي انا غريب بالنسبالج ..اشواق: والله يا فهد غصبن عني . والله انا انا ( مستحيه ) انا
فهد : انتي شو
اشواق : انا احبك يا فهد
فهد مفتح عيونه ويقول بنفسه (( زوجتي اللي هي زوجتي عمرها ماقالت لي هالكلمه والله دنيا وحده ما يخصها فيه تتغزل فيه وزوجتي مب مسوتلي اي اعتبار ))
اشواق : فهد صدق انا احبك ..ومن شهر العسل ما قدر اشلك من بالي
فهد : يعني شو تبيني اودر مرتي واخذج
اشواق : حبكم مب متبادل ..ليش تعيش ويا انسانه ما تحبك
فهد بعصبيه وبصريخ : وانتي شدراج شو على كيفج اتيبين هالرمسه
اشواق : هي قالت انها خذتك من دون خاطرها وانها تحب خالد (( عاد ساره ماقالت نفس الكلام بس اشواق اتييب شوي زياده من عندها ))
فهد عصب : شو هي قالت
اشواق : عيل انا اييب هالرمسه من عندي اسالها اذا تبى
فهد صك على ويه اشواق وعلى طول راح عند ساره بغرفتها
فهد يفتح الباب وشوي بيكسره
ساره واقفه توها تبى تتطلع : باسم الله بلاك انت
فهد ماسك ساره من جتفها : انتي ما تستحين على ويهج تقولين للناس عن حياتنا
ساره مستغربه : اول شي هد ايدي
فهد هد ايدها : تفضلي ارمسي
ساره : ليش انا شو قلت
فهد : قلتلي لفاطمه واشواق انج خذيتيني عن غصب م وانج تحبين خالد
ساره : انا ما قلت جي .. فاطمه سالتني كيف اني في المدرسه كنت لو لد خالتي وبعدين خذتك انت ..وقلت ان ما شي نصيب ..وبعدين تعال من وين عرفت
فهد اتوهق بلع ريجه : ها من مصادري الخاصه
ساره رافعه حوايبها : اي مصادر .. او انك ترمس فاطمه او اشواق
فهد : ليش وانتي يهمج
ساره : يعني تكلم حد منهن صح
--------------------------------------------------------------------------------
فهد يبى يقهر ساره : هيه اكلم اشواق وهي تموت فيه وتباني
ساره فتحت عيونها : صدق والله انت اللي ما تستحي على ويهك
فهد بعصبيه : ساره بلا اهانات
ساره : عيل في ريال متزوج يكلم ويغازل .. لا ويدعي انه يحبني ويموت فيه ..اي حب هذا وما شي اخلاص
فهد : ليش تغارين
ساره : بالعكس مستانسه يمكن تحبها وتفكني من شرك بس انا حبيت اقولك ان حبك جذب لان الاخلاص دليل الحب
فهد : بس انا ما اعطيها ويه هي اللي تتصل فيه وساليها بعد .مب عسب شي .. بس لانه حرام اخون زوجتي حتى لو هي حارمتني من حقوقي ومن كل شي
ساره : عيل خذها عسب تعطيك كل الحقوق
فهد : قصدج تبين اودرج وانفصل عنج
ساره : هيه ابيك تطلقني يا فهد
فهد : والله كنت عارف انج تسوين هالحشره كلها عسب الطلاق بس ماراح اطلقج يا ساره لو شو تسوين لو اخذ على راسج وحده ثانيه ما بطلقج سمعتي انتي مستحيل تكونين لغيري ..
ساره بعصبيه : يعني انا ما احبك ما ادانييييييييييييييك غصب اكون وياك اف
ساره طلعت من الغرفه وهي معصبه
اما فهد فكلام ساره مثل السجين بقلبه اول مره تطلب الطلاق واول مره تقوله انها ما تحبه بهالجرأه
فهد بكل حزن : لو بايدي يا ساره اخليج واودرج جان من زمان ودرتج بس والله ما اقدر ما اشوفج يوم واحد لو اتمين ويايه بجفاج يمكن استحمل بس اذا ابتعدتي عني هو بالنبسبالي موتي . المشكله حبج بدمي وبدونج ما اقدر اعيش .. ومستحيل اكون لغيرج لا اشواق ولا غيرها يقدرون ياخذون مكانتج بقلبي اااااااااااااااااااااه يا ساره لو تقدرين بس تحسين انتي شو بقلبي وحياتي ..
--------------------------------------------------------------------------------
ساره وهي بغرفتها بخاطرها تقول : وي انا شقلت ..اول مره اعطيه في الويه .. شو اسوي قهرني .. بس معقوله اشواق تحبه وتباه ..الريم قالت ان نظرات اشواق غريبه .. والله صدق ما تستحي على ويها تغازل ريل ربيعتها عفان الله من هالبنات ..بس يمكن تحبه صدق وتخليه يودرني .. معقوله فهد يقدر يودرني ويكون لاشواق احسه صعبه .. فهد يموت عليه اوووووووووووووه وانا ليش مهتمه خلا يحب اللي يباه
(( ساره يمكن تقول انه عادي عندها اذا فهد حب غيرها بس اذا صدق صار هالشي اكيد بتحس بالغيره او الانانيه
###########################
محمد وهو متلبس يبى يطلع امه دخلت غرفته
ام محمد : ها يا محمد ناوي تطلع اليوم
محمد وهو مستعيل ويعدل الشماغ : هي والله يا امايه خير بغيتي شي مني
ام محمد : لا بس حبيت اسال عنك وما اشوفك اتيه عندي ولا خلصت اتمصلحت ويايه وخذت اللي تباه
محمد راح عند امه : افا عليج يا امايه مستحيل اتخلى عنج وبعدين دعواتج يالغاليه .. ادعي الريم تكون من نصيبي
ام محمد : وليش هي تقدر ترفضك
محمد ": بهالدنيا كل شي جايز
ام محمد : لا ان شاء الله ما بترفضك اصلا مستحيل اتحصل شراتك ..
محمد يبتسم : السبال بيعون امه غزال
ام محمد : اول مره اشوف في واحد يسب عمره ..
محمد يضحك ..
محمد يحب راس امه : يالله امايه من رخصتج
ام محمد : عسى ربي يفتح لك ابواب الخير والسعاده يا ولدي .. وكل امنياتك تتحقق ..
محمد بخاطره : امنيتي بهالدنيا اكون للريم يا امايه
محمد راح عند فهد
ساره والريم بالصاله وساره تعرف ان محمد بييه
اما فهد فهو يالس يشوف المباراه ومندمج ..
دقو الجرس
ساره توترت اكثر
الخدامه يت : you sir fahad some one wants
فهد يصد :whose
الخدامه : I don’t know
فهد مستغرب : منو ياي
فهد طلع وهو عند الباب شاف محمد
محمد : السلام عليكم
فهد فتح عيونه : هذا انت
محمد بابتسامه : جيف حالك فهد
فهد من غير نفس : بخير
محمد : شو توقفني عند الباب
فهد : تفضل
فهد ومحمد بالميلس
محمد منزل راسه مايعرف كيف يبتدي
محمد : الصراحه يا فهد ماعرف شو اقولك بس حبيت اقولك انت سالت عني ؟
فهد : الصراحه ما وحالي وقت اسال عنك اكثر بس يعني سمعت ناس يمدحونك
محمد : يعني مب رافضني شخصيا
فهد عاقد حوايبه : ليش حد قال انا رافضك
(( فهد استغرب كيف محمد عرف ان فهد ما يباه ))
محمد يبى يغطي السالفه من عنده طبعا بعد تخطيطه مع خالد : الصراحه هيه مرتك قالت لنوره ونوره قالت لخالد وطبعا ربيعي خالد قالي انك ما تباني
--------------------------------------------------------------------------------
فهد : زين عيل يوم عرفت
محمد: انت تتوقع اني ابي انتقم لخالد باختك ..انت لو سالت عني اكثر بتعرف اني عمري ما اذيت حد ..اذا الشخص طبعه الانتقام وخراب بيوت صدقني سمعته ما بتكون زينه او يمكن تسمع عنه شي مب زين .. انا ما امدح نفسي بس الحمد لله انا ملتزم وماعندي هالسوالف وامشي صح .. يعني اخرب حياتي مثلا بزواج انا ما ابيه عسب ربيعي .. وبعدين البنت شلها خص.. اذا ابي انتقم او اذا خالد يبى ينتقم ما بنسير صوب اختك بنروح صوبك باي طريقه كانت او بنتقم باختك من دون طلب الزواج .. ترى وايد شي طرق عسب ننتقم مب بس بالزواج ..وبعدين خالد يوم عرف اني باخذ اختك تفكيره ماكان نفسك مع ان الريم اختك بالعكس قالي ان الريم انسانه خلوقه ودينه ..
فهد ساكت
محمد : احلف باللي ما اقدر احلف بغيره احلف برب العالمين والله يحاسب على كلمتي ان خالد ماطلب مني هالشي .. واني انا خترت الريم من رضايه وانا شارنها والله .. ومستحيل اذيها يا فهد .... فلاتحرمني من الانسانه اللي اخترتها من رضايه يا فهد
فهد سااااااااااااااااااكت
محمد : وانت اسال عني اكثر اذا سمعت اني كانسان ما اصلح لاختك او سمعت عني شي لا على دين ولا على اخلاق صدقني ما بلومك بالرفض بس ترفضني لانك تتوقع اني ياي انتقم فاحب اقولك شيل هالفكره من راسك لان والله نيتي زينه .. ومع الايام راح تعرف اني مب قاصد اللي تتوقعه ..وبعدين خلا البنت تصلي استخاره واذا انا انسان نيتي شينه اكيد الله ما بيوفقني .. وهي اذا ارتاحت اكيد بيكون فيه الخير ان شاء الله لانها شاورت رب العالمين قبل اي حد ..
فهد : على خير ان شاء الله
محمد وقف بابتسامه : يالله عن اذنك فهد
فهد : ما شربت شي ولا تقهويت
محمد : لا مشكور ان شاء الله يوم الخطبه
فهد وقف عسب يسلم عليه : ان شاء الله
محمد راح وهو مستانس لانه قدر يوصل اللي بخاطره لفهد
اما فهد فاقتنع بمحمد .. لان محمد سمعته حلوه بين الناس
ساره وهي تراقب الاوضاع
فهد دخل الصاله
ساره : ها منو كان
فهد : تعرفين منو ..قايله لنوره كل شي
ساره بخاطرها (( اشوه ماعرف اني انا اللي قايله لخالد جان يا ويلي ))
الريم راحت غرفتها لانها مستحيه
ساره : ها يا فهد شو قالك محمد
فهد معصب لين الحينه من كلام ساره بالذات انها قالتله انها ما تحبه
وساره ما تبى تكلم فهد بس غصبن عليها عسب تعرف شو رايه بمحمد
فهد : بسال عن الريال اكثر ..واذا سمعته زينه الله يقدم اللي فيه الخير
ساره ابتسمت : يعني شليت فكره الانتقام
فهد : هيه شليت هالفكره ..وبخلي الريم تصلي استخاره بعد ..
ساره : خلاص انا بخبرها هالشي
فهد يشوف ساره مستانسه ويقول بنفسه (( ياريت تحبين تسعديني كثر ما تحبين تسعدين الغير ))
ساره طرشت مسج لخالد ان فهد اقتنع بمحمد وطبعا فرحة خالد ما توصف ..
ساره تكلم الريم وقالت ان فهد اقتنع
الريم تبتسم : سبحان الله غير رايه بيوم واحد
ساره : يالله بعض الناس ابتسمو بس يوم سمعو عن محمد وبعد تنكر تقول انها مب معجبه فيه
الريم ويها احمر: ساره عاد بس
ساره : المهم صلي استخاره..والله يقدم اللي فيه الخير
الريم مسكت ايد ساره : مشكوره ساره على كل شي صدق وقفتي ويايه مب كمرت اخ وقفتي ويايه اكثر من الاخت نفسها
ساره: لان غلاتج بقلبي شي كبير..انتي ربيعتي وكل شي يا الريم المهم لا تنسين تصلين استخاره
الريم برقه : ان شاء الله
--------------------------------------------------------------------------------
وبعد مرور الايام
فهد وافق على محمد وتمت خطوبة الريم وقررو الملجه تكون بعد كم شهر ..وسعادة محمد ما توصف لان فهد وافق عليه وانه واخيرا بيكون للريم وهو يعد الايام عسب المجله تمر على خير ويقدر يكلم الريم ويبين لها حبه الكبير ..والريم بعد فرحتها كانت كبيره لانها كانت معجبه بمحمد من مده طويله يعني حب من طرفين بس كل واحد يخفي عن الثاني
اما هند .. فما خلت شي بالسوق اشترت كل شي عسب عرسها .. لان عرسها باجر
هند وهي ترتب اغراضها لانها بتعيش ويا سالم في بيتهم
ام خالد دخلت غرفتها : ها يا بنتي تجهزين اغراضج
هند : هيه يا امايه ..تصدقين الايام بسرعه مرت
ام خالد والدمعه بعيونها : يعني بتودريني انتي بعد
نوره دخلت : شو تسوون
ام خالد تصد : هلا ببنيتي
نوره : ليش زعلانه امايه
هند : لاني بودرها
ام خالد وهي تمسح دموعها : انتي يا نوره رحتي وتزوجتي والحينه هند بتزوج ان شاء الله .... محد عندي غير خالد
نوره " فديتج امايه .. انا دومي وياج وبعدين ام ساره ما تقصر اتييه بيتنا .. واصلا انتي لازم تتعودين على بعد هند ..ليش نحن كنا نشوف هند اربع وعشرين ساعه بغرفتها
هند معصبه : نورووه شو قصدج يعني وجودي من عدمه
نوره تضحك : تصدقين اكثر شي راح نشتاقله حق حشرتج .. بس مب تحشرين ريلج جي ..ترى الريال يحب الحرمه المطيعه مب اللي تنكد حياته
هند حاطه ايدها على خصرها : شقصدج
ام خالد : وييييييي الحينه بتضاربون دخيلكم ما بي حشره
نوره : لا ما بنتضارب .. باجر عرس هند محد يخرب فرحتها
هند : واخيرا محد بيدخل فيه ..
ام خالد : ليش ريلج بيدخل فيج
هند : هيه بس مب مثل خلووود الحشره
نوره : خالد مب خلوود بعدين خالد يغار علينا عسب جي .. ومستحيل تحصلين حد بطيبة اخوج خالد
هند : والله زين زين يمكن تخليني اجهز اغراضي
نوره : يالله نشوف العروس باجر كيف تكون
هند بدلع : \طبعا اميره من الاميرات
نوره : قلت يمكن يريب عرسها تتغير بس نفس الشي .. خلا اروح قبل ما تخربين راسي
هند تبتسم
--------------------------------------------------------------------------------
ويا هاليوم اللي تحلم فيه هند
وهند تغيرت بعرسها وايد لانها صبغت شعرها واول مره تخلي فل مكياج ومكياجها بدرجات البني والذهبي يعني مكياج الناري وكان حلو عليها
ونوره وساره والريم ويا بعض يشوفون هند العروس على الكوشه وهي متوتره
ساره طبعا دومها كشيخه لبست لبس اسباني ويابت شعرها على صوب وكله رولات وشعرها عسلي بلون عيونها ولبست اللون الذهبي .. وكانت قمر
ساره : شوفي هند يحليلها والله واخيرا يا هاليوم اللي تحلم فيه
نوره : عاد ان شاء الله تعقل
الريم تضحك : يحليلها والله
ساره تصد تشوف الريم : وان شاء الله عقبال ما نشوفج عروس يا احلى الريم
الريم : ويييييه تو الناس توني مخطوبه بعدني ما ملجت
ساره : توج انخطبتي واربع وعشرين ساعه تفكرين فيه عيل لوملجتي شو بيستويبج
الريم ويها احمر : ساره بلا فضايح ا
نوره : لا ما فضحتج عادي ..ترى نحن مرينا بهالتجربه
ساره من دون نفس : بس انا ما مريت (( قصدها يوم ملجتها ويا فهد )
نوره تضرب ساره وبصوت واطي : لا تنسين ترى الريم اخت فهد ويمكن تفهم قصدج
ساره سكتت
الريم : يالله متى المعرس بييه
نوره تشوف الساعه : الحينه اعتقد
الريم : اقول هو ما عنده الا اخت وحده
نوره : هيه وهي توها مخلصه المدرسه اسمها عاشه
الريم: اها .. يالله الله يسعد هند يارب
نوره : اتمنى هالشي
ساره تاشر على منى : اقول مب هاي منى ربيعة هند
نوره من غير نفس : هيه ما احب هالبنت
الريم : ليش
نوره : تصرفاتها ما تعيبني ..لا بعد تمشي بتكبر تقولين هي صاحبة هالعرس
منى رايحه الكوشه عند هند
منى تحبها وهي منقهره لانها عرست قبلها : يالله مبروك
هند بابتسامه : الله يبارك فيج وعقبالج
--------------------------------------------------------------------------------
منى : ان شاء الله امين
هند : شو انا متغيره ومحلوه
منى طبعا تغار من هند .: .: هيه ..
هند : يالله ان شاء الله نشوفج جريب عروس
منى : اقول وين بتروحون شهر العسل
هند : والله بخاطري سويسرا بس هو يبى لندن
منى : لندن ما فيها شي ..
هند: بخاطره يروحلها .. يقول ربيعه راح هناك ومدحه
منى : بس بعد حظج حلو وداج مكان راقي وحلو
هند : هيه الحمد لله
(( منى غيرانه منها وايد لانها ما توقعت ان هند تزوج سالم .. ولان هند اصغر منها بكم سنه .. ())
هند وايد فرحانه بهاليوم .. حست انها بتعيش بسعاده وان كل طلباتها راح تتنفذ ومحد يقدر يتحكم فيها
وانتهى عرس هند وسالم بفرح والكل مستانس على هاليوم وبالذات هند
